အမေရိကန်ဒေါ်လာဈေး ကျပ် ၇၄၀ အထိ ကျဆင်းလာ

၂၀၁၁ ခုနှစ်အတွင်း အမေရိကန်ဒေါ်လာဈေးများ ဆက်တိုက် ကျဆင်းလာရာမှာ ဇွန်လ ၁၁ ရက် နေ့တွင် အမေရိကန်ဒေါ်လာ တစ်ဒေါ်လာလျှင် ကျပ် ၇၄၀ အထိ ကျဆင်းလာခဲ့ကြောင်း သတင်းရရှိသည်။

“ဒီလထဲမှာ အမေရိကန်ဒေါ်လာ ဈေးတွေ ဆက်တိုက်ဆိုသလိုပဲ ကျလာတယ်။ အဲလိုကျတဲ့အချိန်မှာပဲ ကျပ် ၇၅၀ အထိကျမယ်၊ ကျပ် ၇၀၀ အထိကျမယ်ဆိုတဲ့ ကောလာဟလတွေလည်း ထွက်လာတယ်။ တချို့ကတော့ exchange rate တစ်ခုခုနဲ့ သတ်မှတ်ပြီးတော့ နှုန်းရှင်ထားနိုင်တယ်ဆိုတဲ့ အသံမျိုးတွေလည်း ထွက်တယ်။ သက်ဆိုင်ရာဘက်ကတော့ ဒါနဲ့ပတ်သက်ပြီး ဘာမှထုတ်ပြန် ကြေညာတာမျိုးလည်း မတွေ့ရပါဘူး။ တစ်ရက်တစ်ခြား ထိုးကျလာတာက Demand မရှိလို့လည်း ဖြစ်နိုင်သလို ကောလာဟလကြောင့်လည်း ဖြစ်နိုင်ပါတယ်” ဟု စီးပွားရေး လုပ်ငန်းရှင်တစ်ဦးက ပြောပြခဲ့သည်။

“အခုလက်ရှိ ကျဆင်းနေတဲ့ အမေရိကန်ဒေါ်လာ ဈေးနှုန်းက ၂၀၀၄ခုနှစ်က ဈေးနှုန်းထက်တောင် နိမ့်ကျနေတယ်။ အဲဒီတုန်းကရွှေဈေးက ကျပ်နှစ်သိန်းဝန်းကျင်ပဲ ရှိတယ်။ အခု ရွှေဈေးက ကျပ်ခြောက်သိန်း အထက်မှာရှိတယ်။ အခုဈေးနဲ့နှိုင်းယှဉ်လိုက်ရင် ဒေါ်လာဈေးက သိသိသာသာကြီးကို ကျနေတာပါ။ ပို့ကုန် လုပ်ငန်းတွေအတွက်တော့ ထိခိုက်နေပါတယ်”ဟု ပြည်ပသို့ဆန်တင်ပို့နေသော ကုမ္ပဏီတစ်ခုမှ တာဝန်ရှိသူ တစ်ဦးက ပြောပြခဲ့သည်။

ဇွန်လ ၁၀ ရက်နေ့တွင် ငွေကြေးဈေးကွက်ရှိ ပေါက်ဈေးများမှာ အမေရိကန်ဒေါ်လာ တစ်ဒေါ်လာလျှင် ကျပ် ၇၅၀ နှင့် ကျပ် ၇၆၀ ကြား၊ အက်ဖ်အီးစီ တစ်ယူနစ်လျှင် ၆၆၅ ကျပ် နှင့် ကျပ် ၆၇၀ ကြား၊ ပြည်ပပို့ကုန်မှ ရငွေ(earning) ဈေးမှာ ၇၈၃ ကျပ်နှင့် ၇၈၅ ကျပ်ကြားရှိကြောင်းသိရသည်။

အစဉ်အလာအားဖြင့် ဈေးမာခဲ့သော အမေရိကန်ဒေါ်လာဈေးမှာ ၂၀၀၉ ခုနှစ် နှစ်ကုန်ပိုင်းမှစကာ တဖြည်းဖြည်းလျော့ဆင်းခဲ့ကြောင်း နှင့် ၂၀၁၀ ပြည့်နှစ်ဆန်းပိုင်းတွင် ကျပ် ၁၀၀၀ လောက်ဖြင့် အရောင်းအ၀ယ် ဖြစ်ခဲ့ရာမှထပ်မံကျဆင်းခဲ့ပြီး ၂၀၁၁ ခုနှစ် မေလတွင် အမေရိကန် ဒေါ်လာ တစ်ဒေါ်လာလျှင် ကျပ် ၈၀၀ အောက်သို့ထိုးဆင်းခဲ့ကာ ပြည်ပပို့ကုန်မှရငွေ မှာလည်း ၈၀၅ ကျပ်နှင့် ၈၁၅ ကျပ် ကြားတွင်သာရှိကြောင်း သိရသည်။

ယင်းကဲ့သို့ ဒေါ်လာဈေးကျဆင်းမှုကို ၂၀၁၀ ပြည့်နှစ်အတွင်း ၀င်ရောက်လာသော ပြည်ပရင်းနှီး မြှုပ်နှံမှုများနှင့် ပတ်သက်သကဲ့သို့ ဈေးကွက်အတွင်းသို့ အကြောင်းတရားအမျိုးမျိုးဖြင့် ၀င်ရောက်လာသော hot money များကြောင့်လည်း ဖြစ်နိုင်ကြောင်း၊ အလားတူပင် အိမ်ခြံမြေဈေးကွက်အတွင်းမှ တစ်ဆင့် ၀င်ငွေရလမ်း ၀င်ရောက်လာသော ငွေများကြောင့်လည်း သက်ရောက်မှုရှိနိုင်ကြောင်း သုံးသပ်ကြသည်။

“ဒါကို ဘယ်သူမှအတိအကျ မပြောနိုင်ပါဘူး။ ဒီလိုပဲ ဘာကြောင့် ဖြစ်တယ်ဆိုတဲ့ ထင်ကြေးမျိုးပေးနေ ကြတာပါ။ အမှန်က အ၀င်များနေလို့ဖြစ်တဲ့သဘောပါ။ နောက်ဆုံးတော့ ဒေါ်လာဈေးကျတော့ ပြည်ပပို့ ကုန်တင်ပို့သူနဲ့ တကယ်ထုတ်လုပ်သူတွေ ထိခိုက်တာတော့ အမှန်ပဲ” ဟု ဒေါက်တာအောင်ထွန်းသက်က ပြောပြခဲ့သည်။

၂၀၁၀ ပြည့်နှစ် Economic and Social Commission for Asia and the Pacific (ESCAP) မှ ထုတ်ပြန် ထားသောစာတမ်းများ အရ Asia Pacific Region အတွင်း hot money များဝင်ရောက်လာကြောင်းနှင့် မြန်မာနိုင်ငံအနေဖြင့်မူ ငွေကြေးဈေးကွက် မရှိသည့်အတွက် သက်ရောက်မှု သိပ်မရှိနိုင်ဟူသော သုံးသပ်ချက်များ ရှိသကဲ့သို့ အခြားနည်းလမ်းဖြင့် ဥပမာ ရင်းနှီးမြှုပ်နှံမှု ပုံစံအားဖြင့်လည်းကောင်း၊ အိမ်နီး ချင်းနိုင်ငံများနှင့် ချိတ်ဆက်၍လည်းကောင်း ၀င်ရောက်လာနိုင်ကြောင်း သုံးသပ်မှုများလည်း ရှိနေသည်။


ELEVEN MEDIA GROUP မှ ကူးယူဖော်ပြသည်။